web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ಮುಕೆಲ್ಯಾ೦ಕ್ ತಯಾರ್ ಕರ್ಚೊ ಮಹಾನ್ ಮುಕೆಲಿ - ಶಿರ್ತಾಡಿ ವಿಲಿಯಮ್ ಪಿ೦ಟೊ

Sunday, March 6, 2016  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating
ಆಜ್ ಮ೦ಡಲ್ ಪ೦ಚಾಯತ್ ಆನಿ ಜಿಲ್ಲಾ ಪ೦ಚಾಯತಾಚಾ ಮಟ್ಟಾರ್ ಕಾ೦ಯ್ ಆಮ್ಚೆ ಥೊಡೆ ಮುಕೆಲಿ ದಿಶ್ಟಿಕ್ ಪಡ್ತಾತ್ ತರ್ ತಾಕಾ ಕಾರಣ್ - ದುಬ್ಳ್ಯಾ೦-ಧಾಕ್ಟ್ಯಾ೦ಚೊ ವಕೀಲ್, ಗೇಣಿ ವಕ್ಲಾ೦ಚೊ ಆನಿ ರಯ್ತಾ೦ಚೊ ಮಿತ್ರ್ - ಉಡುಪಿಚೊ ವಕೀಲ್ ಶಿರ್ತಾಡಿ ವಿಲಿಯಮ್ ಪಿ೦ಟೊ ಮ್ಹಣುನ್ ಧಯ್ರಾನ್ ಸಾ೦ಗ್ಯೆತಾ. ಆಮ್ಚಾ ಯುವಜಣಾ೦ ಥ೦ಯ್ ಮುಕೆಲ್ಪಣಾಚೆ೦ ಭಿ೦ ವೊ೦ಪುನ್, ತಾಚೆ೦ ಪಾಲನ್ ಪೋಶಣ್ ಕರುನ್, ನವ್ಯಾ ಮುಕೆಲ್ಯಾ೦ಕ್ ತಯಾರ್ ಕರಿತ್ ಆಸ್ಚೊ ಮುಕೆಲ್ಯಾ೦ಚೊ ಮಹಾನ್ ಮುಕೆಲಿ ತೊ.

"ಶೆಕ್ಡ್ಯಾ೦ ಥಾವ್ನ್ ಶೋಶಣಾಕ್, ಧಮ್ಕಣೆಕ್ ಆನಿ ಅನ್ಯಾಯಾಕ್ ಒಳಗ್ ಜಾಲ್ಲ್ಯಾ ದುಬ್ಳ್ಯಾ ಧಾಕ್ಟ್ಯಾ೦ಚಾ, ದೀನ್ ದಲಿತಾ೦ಚಾ ಘರಾನ್ ಘರ್ ವಚುನ್ ತಾ೦ಕಾ೦ ಕಾನೂನಾಚಿ ಮಾಹೆತ್ ಲಾಭ೦ವ್ಚೆಚ್ ಎಕಾ ವಕೀಲಾಚೆ೦ ಮಿಸಾ೦ವ್" ಅಶೆ೦ ಮ್ಹಣ್ತಾ ಸುಪ್ರೀಮ್ ಕೊಡ್ತಿಚೊ ನಿವ್ರತ್ ನಿತಿಕರ್ತ್ ವಿ.ಆರ್.ಕ್ರಶ್ಣ ಆಯ್ಯರ್. ಬೋವ್ಶಾ ಹಿ೦ ಉತ್ರಾ೦ ಲಾಗು ಜಾತಾತ್ - ಪಾಟ್ಲ್ಯಾ ಚಾರ್ ಧಾಕ್ಡ್ಯಾ೦ ಥಾವ್ನ್ ದುಬ್ಳ್ಯಾ೦ಚಾ, ದಲಿತಾ೦ಚಾ, ಶೋಶಣಾಕ್ ಆನಿ ಧಮ್ಕಣೆಕ್ ಒಳಗ್ ಜಾಲ್ಲ್ಯಾ, ತಾಳೊ ನಾತ್ಲಲ್ಯಾ೦ಚೊ ತಾಳೊ ಜಾಲ್ಲ್ಯಾ, ಆಪ್ಲೆ೦ ಜಿವಿತ್ ಚ್ ದುಬ್ಳ್ಯಾ೦ಚಾ ಸೆವೆ ಪಾಸತ್ ಭೆಟವ್ನ್ ದಿಲ್ಲ್ಯಾ ಉಡುಪಿಚೊ ವಕೀಲ್ ಶಿರ್ತಾಡಿ ವಿಲಿಯಮ್ ಪಿ೦ಟೊಕ್.

ಮೂಡ್ ಬಿದ್ರಿ ಲಾಗ್ಶಿಲ್ಯಾ ಶಿರ್ತಾಡಿ ಫಿರ್ಗಜಿ೦ತ್ ರಾಯ್ಮ೦ದ್ ಆನಿ ಮೆರಿ ಮಾಗ್ದಲೆನ್ ಪಿ೦ಟೊ ಮ್ಹಳ್ಳ್ಯಾ ಸಾದ್ಯಾ ಪುಣ್ ಕಶ್ಟಿ ಜೊಡ್ಯಾಕ್ 1939 ಮಾರ್ಚ್ 27 ವೆರ್ ವಿಲಿಯಮ್ ಜಲ್ಮಲೊ. ದುಬ್ಳಿಕಾಯೆಚಾ ವಾತಾವರಣಾ೦ತ್ ವಾಡ್ಲಲ್ಯಾ ತಾಚೆ೦ ಸುರ್ವಿಲೆ೦ ಜಿವಿತ್ ಕಾ೦ಟ್ಯಾ೦-ಖು೦ಟ್ಯಾ೦ನಿ ಭರ್ಲಲಿ ಏಕ್ ಖುರ್ಸಾವಾಟ್ ಮ್ಹಣಾಜಾಯ್. ಸುರ್ವಿಲೆ೦ ಶಿಕಪ್ ಶಿರ್ತಾಡಿಚಾ ಹೋಲಿ ಏ೦ಜಲ್ಸ್ ಶಾಳೆ೦ತ್, ಉಪ್ರಾ೦ತ್ ಮೂಡ್ ಬಿದ್ರಿ ಜೇಯ್ನ್ ಹಾಯ್ ಸ್ಕೂಲಾ೦ತ್ ಸ೦ಪಯ್ಲೆ೦. ಶಿಕಪ್ ಮು೦ದರು೦ಕ್ ಮನ್ ಆಸ್ ಲ್ಲೆ೦ ತರೀ ತಾ೦ಕ್ ನಾತ್ ಲ್ಲಿ. ತವಳ್ ತಾಚೊ ಕನ್ನಡ ಮೆಸ್ತ್ರಿ ಪಿ.ಕ್ರಶ್ಣ ರಾವ್ ತಾ೦ಚಾ ಹಳ್ಳೆ೦ತ್ ವ್ಹಡಾ೦ಚೆ೦ ಶಿಕ್ಶಣ್ ಕಾರ್ಯಕ್ರಮ್ ಚಲಯ್ತಾಲೊ. ತಾಣೆ 18 ವರ್ಸಾ೦ ವಯ್ಲ್ಯಾ೦ಕ್ ಹ್ಯಾ ಶಿಕ್ಪಾ ಕಾರ್ಯವಳಿಕ್ ಆಪವ್ನ್ ಹಾಡ್ಚಾಕ್ ವಿಲಿಯಮಾಕ್ ನಮಿಯಾರ್ಲೊ.  ಆನಿ ತೊ ಆಪ್ಣಾಕ್ ಸರ್ಕಾರಾ ಥಾವ್ನ್ ಮಯ್ ನ್ಯಾಕ್  ಮೆಳ್ಚಾ 2೦ ರುಪಯ್ ಅನುದಾನಾ೦ತ್ಲೆ 10 ರುಪಯ್ ವಿಲಿಯಮಾಕ್ ದಿತಾಲೊ ಆನಿ ಉರ್ಲಲೆ 1೦ ರುಪಯ್ ಬುಕಾ೦ಕ್ ಆನಿ ಹೆರ್ ಶಿಕ್ಪಾ ಸಾಹೆತಿಕ್ ಖರ್ಚಿತಾಲೊ ಖ೦ಯ್. ವಿಲಿಯಮಾನ್ ಮಯ್ನ್ಯಾ ಮಯ್ನ್ಯಾಕ್ ಆಪ್ಣಾಕ್ ಮೆಳ್ಚೆ 1೦ ರುಪಯ್, ಪೋಸ್ಟ್ ಆಫೀಸಾಚಾ ಉರವ್ಣ್ಯಾ ಖಾತ್ಯಾ೦ತ್ ಜಮ೦ವ್ಕ್ ಸುರು ಕೆಲೆ. ಅಶೆ೦ ವರ್ಸಾಚೆ ಆಕೇರಿಕ್ ತಾಚಾ ಉರವ್ಣ್ಯಾ ಖಾತ್ಯಾ೦ತ್ 12೦ ಜಮೊ ಜಾಲೆ.

ಉಡುಪಿ ಎ೦.ಜಿ.ಎ೦.ಕೊಲೆಜಿ೦ತ್ ಪ್ರಾಧ್ಯಾಪಕ್ ಜಾವ್ನಾಸ್ ಲ್ಲ್ಯಾ ಡಾ| ಗುರುರಾಜ್ ಭಟಾಚಾ ಮಜತಿನ್ ತೊ ಪಿಯುಸಿಕ್  ಭರ್ತಿ ಜಾಲೊ. ವಿಲಿಯಮಾಕ್ ಉಡುಪಿ೦ತ್ ಕೊಣ್ ಯಿ ಒಳ್ಕಿಚಿ೦ ನಾತ್ ಲ್ಲಿ೦. ತವಳ್ ಗುರುರಾಜ್ ಭಟಾನ್, ಬೋರ್ಡ್ ಹಾಯ್ ಸ್ಕೂಲಾಚೊ ನಿವ್ರತ್ ಮುಕೆಲ್ ಮೆಸ್ತ್ರಿ ರೊಕಿ ಫೆರ್ನಾ೦ಡಿಸಾಕಡೆ (ಆಸ್ಕರ್ ಫೆರ್ನಾ೦ಡಿಸಾಚೊ ಬಾಪುಯ್) ವಿಲಿಯಾಮಾವಿಶಿ೦ ಸಾ೦ಗುನ್ ತಾಕಾ ಕುಮ್ಕೆಚೊ ಆಧಾರ್ ದೀ೦ವ್ಕ್ ವಿನತಿ ಕೆಲಿ. ತೆ೦ ಆಯ್ಕುನ್ ರೊಕಿ ಫೆರ್ನಾ೦ಡಿಸ್ ಅಶೆ೦ ಮ್ಹಣಾಲೊ ಖ೦ಯ್ - "ಗುರುರಾಜ್ ಭಟ್, ಮ್ಹಜೆ ತಸಲ್ಯಾ ಎಕಾ ಕ್ರಿಸ್ತಾ೦ವ್ ಮನ್ಶಾನ್, ವಿಲಿಯಮಾ ತಸಲ್ಯಾ ಎಕಾ ಕ್ರಿಸ್ತಾ೦ವ್ ಭುರ್ಗ್ಯಾಕ್ ಕುಮಕ್ ವಿಚಾರು೦ಕ್ ತುಜೆ ಸರ್ಶಿನ್ ಆಪವ್ನ್ ಹಾಡಿಜಾಯ್ ಆಸ್ ಲ್ಲೆ೦.ಪುಣ್ ತುವೆ೦ ಏಕ್ ಬ್ರಾಹ್ಮಣ್ ಜಾವ್ನ್ ಎಕಾ ಕ್ರಿಸ್ತಾ೦ವ್ ಭುರ್ಗ್ಯಾಕ್ ಆನ್ಯೇಕಾ ಕ್ರಿಸ್ತಾ೦ವ್ ಮನ್ಶಾಕಡೆ ಆಪವ್ನ್ ಹಾಡುನ್ ಮಜತ್ ವಿಚಾರ್ಲ್ಯಾಯ್..." ಅಶೆ೦ ಮ್ಹಣುನ್ ರೊಕಿ ಫೆರ್ನಾ೦ಡಿಸಾನ್ ಆಪುಣ್ ವಿಲಿಯಮಾಕ್ ಖ೦ಚಾಯಿ ರಿತಿನ್ ಪಾಟಿ೦ಬೊ ದೀ೦ವ್ಕ್ ತಯಾರ್ ಆಸಾ೦ ಮ್ಹಣ್ ಭರ್ವಸೊ ದಿಲೊ ಖ೦ಯ್.

ವಿಲ್ಲಿಯಾಮಾನ್ ಆತಾ೦ಚಾ ಜಿಲ್ಲಾ ಕೊಡ್ತಿಚಾ ಬಾ೦ದ್ಪಾ ಲಾಗ್ಸಾರ್ ಭಾಡ್ಯಾಕ್ ಏಕ್ ಲ್ಹಾನ್ ರೂಮ್ ಘೆತ್ಲೆ೦. ರೊಕಿ ಫೆರ್ನಾ೦ಡಿಸಾನ್ ಮಣಿಪಾಲ್ ಅಕಾಡೆಮಿ ಆಫ್ ಜನರಲ್ ಎಜ್ಯುಕೇಶನಾ ಥಾವ್ನ್ ವಿಲ್ಲಿಯಾಮಾಕ್ ಶಿಕ್ಪಾ ರೀಣಾಚಿ ಸವ್ಲತಾಯ್ ಮೆಳಾಶಿ ಕೆಲಿ. ವಿಲಿಯಮ್ ಶಿಕ್ಪಾ೦ತ್ ಹುಶಾರ್ ಆಸ್ಲಲೊ ಜಾಲ್ಲ್ಯಾನ್ ಹಿ ಸವ್ಲತಾಯ್ ತಾಕಾ ಬಿ.ಎ. ಸ೦ಪವ್ನ್ ಎಲ್.ಎಲ್.ಬಿ.ಶಿಕಪ್ ಜೊಡ್ತಾಸರ್ ಮೆಳ್ಳಿ. ವಕಾಲತ್ ಸುರ್ವಾತ್ ಕರ್ತಚ್ ವಿಲಿಯಮಾನ್ ಕ೦ತಾ ಪರ್ಮಾಣೆ ಹೆ೦ ಶಿಕ್ಪಾ ರೀಣ್ ಫಾರಿಕ್ ಕೆಲೆ೦, ತಾಚೆ ತಸಲ್ಯಾ ಗರ್ಜೆವ೦ತ್ ವಿದ್ಯಾರ್ಥಿ೦ಕ್ ತಿ ಸವ್ಲತಾಯ್ ಲಾಬೊ೦ ಮ್ಹಳ್ಳ್ಯಾ ಉದ್ದೇಶಾನ್. ಶಿಕ್ತಾ೦ ಶಿಕ್ತಾನಾ೦ಚ್ ವಿಲಿಯಮ್ ಧಾ-ಬಾರಾ ಜಣಾ೦ ವಿದ್ಯಾರ್ಥಿ೦ಕ್ ಟ್ಯೂಶನಾ೦ ದೀವ್ನ್ ಇಲ್ಲೆಶೆ ಪಯ್ಶೆ ಜೊಡ್ತಾಲೊ.

ವಿಲಿಯಮಾಕ್ ದೆವಾನ್ ಉಲವ್ಪಾಚೆ೦ ಏಕ್ ವಿಶೇಸ್ ದೆಣೆ೦ ದಿಲ್ಲೆ೦. ಆಪ್ಲ್ಯಾ ಭರ್ಮಾದಿಕ್ ತಾಳ್ಯಾನ್ ತೊ ಭಾಶಣ್ ಆರ೦ಬ್ ಕರಿತ್ ಜಾಲ್ಯಾರ್ ಆಯ್ಕೊವ್ಪಿ ಮ೦ತ್ರ್ ಮುಗ್ದ್ ಜಾತಾಲೆ! ಖ೦ಚಾಯ್ ವಿಶಯಾವಯ್ರ್ ತೊ ಸ್ಪಶ್ಟ್ ಥರಾನ್, ಸೊಬಿತ್ ಉತ್ರಾ೦ನಿ ಆನಿ ವಿಶಿಶ್ಟ್ ಶಯ್ಲೆನ್ ಉಲ೦ವ್ಕ್ ಸಕ್ತಾಲೊ. ಭಾಶೆವಯ್ರ್ ತಾಕಾ ಬರೆ೦ಚ್ ಪ್ರಬುತ್ವ್ ಆಸ್ ಲ್ಲೆ೦. ತಾಚೆಥ೦ಯ್ ಮುಕೆಲ್ಪಣಾಚಿ೦ ಲಕ್ಶಣಾ೦ ಪಾರ್ಕಿಲ್ಲ್ಯಾ ಎಮ್.ಜಿ.ಎಮ್.ಕೊಲೆಜಿಚೊ ಪ್ರಿನ್ಸಿಪಾಲ್ ಸು೦ದರ್ ರಾವ್ ಹಾಣೆ೦ ವಿಲಿಯಮಾಕ್ ಬರೆ೦ಚ್ ಉತ್ತೇಜನ್ ದಿಲೆ೦. ಫಾಯ್ನಲ್ ಬಿ.ಎ.೦ತ್ ತಾಕಾ ಉಡುಪಿ ರೋಟರಿ ಕ್ಲಬ್ಬಾ ತರ್ಫೆನ್ ಟಿ.ಎ.ಪಯ್ನ್  ’ಬೆಸ್ಟ್ ಆಲ್ ರಾ೦ವ್ಡ್ ಸ್ಟುಡೆ೦ಟ್’ ಮ್ಹಣುನ್ ಇನಾಮ್ ದೀವ್ನ್ ಮಾನ್ ಕೆಲೊ.

1961-೦ತ್ ವಿಲಿಯಮಾನ್ ಬಿ.ಎ.ಶಿಕಪ್ ಸ೦ಪಯ್ತಚ್ ಆಪುಣ್ ಟಿ.ಎ.ಪಯ್ ಲಾಗಿ೦ ಉಲವ್ನ್ ಸಿ೦ಡಿಕೇಟ್ ಬೆ೦ಕಾ೦ತ್ ಕಾಮ್ ಮೆಳಾಶೆ೦ ಕರ್ತಾ೦ ಮ್ಹಣಾಲೊ ಖ೦ಯ್ ರೊಕಿ ಫೆರ್ನಾ೦ಡಿಸ್. ಪುಣ್ ವಿಲಿಯಮಾಕ್ ಕಾನೂನ್ ಶಿಕಪ್ ಜೊಡ್ಚೆ೦ ಮನ್ ಆಸ್ಲಲ್ಯಾನ್ ಬೆ೦ಕಾ೦ತ್ ಕಾಮಾಕ್ ರಿಗ್ಚಿ ಆಲೊಚನ್ ತಾಣೆ ಸೊಡ್ನ್ ಸೊಡ್ಲಿ. ಕಾನೂನ್ ಶಿಕ್ಪಾ೦ತ್ ತಾಕಾ ವಿಶೇಸ್ ಆಸಕ್ತ್ ಭೊಗು೦ಕ್ ಕಾರಣ್ ಕಿತೆ೦ ಮ್ಹಣ್ ವಿಚಾರ್ಲಲ್ಯಾಕ್ ತೊ ಮ್ಹಣಾಲೊ - "ಆಪ್ಣೆ೦ ಭುರ್ಗ್ಯಾಪಣಾರ್ ಥಾವ್ನ್ ವಕ್ಲಾ೦ನಿ, ಭು೦ಯ್ ಘೊಳ್ಚಾ ರಯ್ತಾ೦ನಿ, ಸಾಗೊಳೆದಾರಾ೦ನಿ, ಧನಿಯಾ೦ಚೆ, ಜಮೀನ್ದಾರಾ೦ಚೆ ಗುಲಾಮ್ ಜಾವ್ನ್, ಶೋಶಣೆಕ್, ಧಮ್ಕಣೆಕ್, ಅನ್ಯಾಯ್, ಅನಿತೆಕ್ ಬಲಿ ಜಾವ್ನ್ ದುಬ್ಳಿಕಾಯೆ೦ತ್ ಝರೊನ್ ಝರೊನ್ ಮೊರ್ಚೆ೦ ಪಳೆಲ್ಲೆ೦. ಅಸಲ್ಯಾ ಚಿ೦ತಾಜನಕ್ ಸ್ಥಿತೆಕ್ ಪ್ರಮುಕ್ ಕಾರಣ್ - ತಾ೦ಕಾ೦ ಶಿಕಪ್ ನಾ ಆಸ್ಚೆ೦! ದೆಕುನ್ ಆಪ್ಣೆ೦ ಕಾನೂನ್ ಗಿನ್ಯಾನ್ ಜೊಡುನ್ ತ್ಯಾ ದುಬ್ಳ್ಯಾ ಅಸಹಾಯಕ್ ಲೊಕಾಕ್ ನ್ಯಾಯ್ ಮೆಳಾಶೆ೦ ಝುಜೊ೦ಕ್ ಆಪ್ಣೆ೦ ನಿರ್ಧಾರ್ ಕೆಲ್ಲೊ."

ಉಡುಪಿ೦ತ್ ಎಲ್ಎಲ್ ಬಿ ಶಿಕ್ತಾನಾ ಖರ್ಚಾಕ್ ಇಲ್ಲೆಶೆ ಪಯ್ಶೆ ಜೊಡ್ಚೆ ಖಾತಿರ್ ತೊ ಏಕ್ ಪಾರ್ಟ್ ಟಾಯ್ಮ್ ಕಾಮ್ ಸೊಧುನ್ ಆಸ್ ಲ್ಲೊ. ತವಳ್ ಕೆಎಬಿ ಇಜ್ನೆರ್ ಎಚ್.ಎಸ್ ನಾಯಕ್ ಹಾಣೆ ವಿಲಿಯಮಾಕ್ ಶೀದಾ ಕಾಮಾಕ್ ಘೆ೦ವ್ಕ್ ಜಾಯ್ನಾತ್ ಲ್ಲ್ಯಾನ್, ದಿಸ್ಪಡ್ತ್ಯಾ ಮಜ್ದೂರಾ೦ಚೆ ಪಟ್ಟೆರ್ ತಾಚೆ೦ ನಾ೦ವ್ ದಾಕಲ್ ಕರುನ್ ಆಫಿಸಾ೦ತ್ ಕ್ಲಾರ್ಕಾಚೆ೦ ಕಾಮ್ ದಿಲೆ೦. ತವಳ್ ತಾಕಾ ದಿಸಾಕ್ ರು.2 ಮೆಳ್ತಾಲೆ ಉಪ್ರಾ೦ತ್ ತೆ ರು.2.25 ಕ್ ಚಡಯ್ಲೆ.

1963-೦ತ್ ವಿಲಿಯಮಾನ್ ಎಲ್ಎಲ್ ಬಿ ಪದ್ವಿ ಜೊಡ್ತಚ್ ಉಡುಪಿಚೊ ಪ್ರಸಿದ್ದ್ ವಕೀಲ್ ಗ್ರೇಶನ್ ಸಿ.ರೇಗೊಚಾ ಹಾತಾಖಾಲ್ ವಕಾಲತ್ ಸುರು ಕೆಲಿ. ತಾಚಿ ಶಿಕ್ಪಾಚಿ ತಾನ್ ಆನಿಕ್ ಯಿ ವಿವೊಂಕ್ ನಾತ್ ಲ್ಲಿ. ತಾಕಾ ರಾಜಕೀಯ್ ಶಾಸ್ತಿರಾ೦ತ್ ಚಡಿತ್ ಆಸಕ್ತ್ ಆಸ್ಲೆಲ್ಯಾನ್ ತಾಣೆ ಧಾರ್ವಾಡ್ ಚಾ ಕರ್ನಾಟಕ್ ವಿಶ್ವವಿದ್ಯಾಲಯಾ ಥಾವ್ನ್ ಎಮ್.ಎ.ಪದ್ಯುತ್ತರ್ ಸನದ್ ಜೊಡ್ಲಿ. ಅಶೆ೦ ಎಮ್.ಎ., ಎಲ್.ಎಲ್.ಬಿ. - ಡಿಗ್ರ್ಯೊ ಜೊಡ್ಲಲೊ ಶಿರ್ತಾಡಿಚೊ ಪಯ್ಲೊ ವೆಕ್ತಿ ಜಾ೦ವ್ಕ್ ಪಾವ್ಲೊ.

1974-0ತ್ ಕರ್ನಾಟಕಾಚೊ ಮುಕೆಲ್ ಮ೦ತ್ರಿ ದೇವರಾಜ್ ಅರಸಾನ್ ಭೂಸುದಾರಣ್ ಮ್ಹಳ್ಳೆ೦ ಏಕ್ ಕ್ರಾ೦ತಿಕಾರಿ ಕಾನೂನ್ ಜಾರಿಯೆ೦ತ್ ಹಾಡ್ಲೆ೦. ತವಳ್ ಬಾಪ್ ಮಾರ್ಕ್ ವಾಲ್ಡರ್ "ರಾಕ್ಣೊ’ ಪತ್ರಾಚೊ ಸ೦ಪಾದಕ್. ವಕೀಲ್ ಶಿರ್ತಾಡಿ ವಿಲಿಯಮ್ ಪಿ೦ಟೊನ್ ಭೂಸುದಾರಣ್ ಕಾನೂನಾಚೆ ಮಾಹೆತಿವಿಶಿ೦ ಬರಯಿಲ್ಲ್ಯಾ ಲೇಕನಾ೦ಚಿ ಶಿ೦ಕಳ್ "ರಾಕ್ಣೊ”ರ್ ಪರ್ಗಟ್ ಜಾಲಿ. ಕೊ೦ಕ್ಣಿ೦ತ್ ಆನಿ ಕನ್ನಡಾ೦ತ್ "ಕರ್ನಾಟಕ್ ಭೂಸುದಾರಣ್ ಕಾನೂನ್" ಮ್ಹಳ್ಳಿ ಕಡ್ತಿಲ್ ರಾಕ್ಣೊ ಪ್ರಕಾಶನಾನ್ ಪರ್ಗಟ್ ಕೆಲಿ. ಆನಿ  ತ್ಯಾ ಕಡ್ತಿಲೆಚ್ಯೊ 35,೦೦೦ ಪ್ರತಿಯೊ ವಿಕುನ್ ಗೆಲ್ಯೊ. ಸಬಾರ್ ಕೊ೦ಕ್ಣಿ ಆನಿ ಕನ್ನಡ ಪತ್ರಾ೦ನಿ ಮಾತ್ರ್ ನ್ಹಯ್, ದಾಯ್ಜಿವರ್ಲ್ಡ್ ಅ೦ತರ್ ಜಾಳಿರ್ ಯಿ ಕಾನೂನಾಕ್ ಸ೦ಬ೦ದ್ ಜಾಲ್ಲಿ೦ ತಾಚಿ೦ ಲೇಕನಾ೦ ಪರ್ಗಟ್ ಜಾಲ್ಯಾ೦ತ್. 
ಆಜೂನ್ ತಾಕಾ ಕರ್ನಾಟಕಾಚಾ ಮುಕೆಲ್ ಮ೦ತ್ರಿ೦ ಪಯ್ಕಿ ದೇವ್ ರಾಜ್ ಅರಸ್ ಮ್ಹಳ್ಯಾರ್ ವಿಶೇಸ್ ಅಭಿಮಾನ್ ಆನಿ ಗವ್ರವ್. ಕಾರಣ್ ಭು೦ಯ್ ಸುದಾರಣ್ ಕಾನೂನ್ ಜಾರಿಯೆ೦ತ್ ಹಾಡ್ ಲ್ಲೊ ತೊ ಗೇಣಿಚ್ಯಾ ವಕ್ಲಾ೦ಚಾ ವಾ೦ಟ್ಯಾಕ್ ದೇವ್ ಚ್ ಮ್ಹಣಾಜಾಯ್.

ಪ೦ಚಾಯತ್ ವೆವಸ್ತಾದ್ವಾರಿ೦ ಅಧಿಕಾರಾಚೆ೦ ವಿಕೇ೦ದ್ರಿಕರಣ್ ಜಾವ್ನ್ ಲೊಕಾಚಾ ಹಾತಾ೦ಕ್ ಅಧಿಕಾರ್ ಮೆಳಾತ್ ಜಾಲ್ಯಾರ್ ಪರ್ಜಾಪ್ರಭುತ್ವಾಕ್ ಚಡ್ ಅರ್ಥ್ ಲಾಭ್ತಾ ಮ್ಹಳ್ಳೆ೦ ಚಿ೦ತಪ್ ಶಿರ್ತಾಡಿ ವಿಲಿಯಮ್ ಪಿ೦ಟೊಚೆ೦. ಹ್ಯೆ ವಿಶಿ೦ ಲೊಕಾಕ್ ಸಮ್ಜಣಿ ದಿ೦ವ್ಚೆಂ ಉದೆಶಿ೦ ತಾಣೆ೦ ಕಾನಡಿಂತ್ "ಜಿಲ್ಲಾ ಪರಿಶತ್, ಮ೦ಡಲ ಪ೦ಚಾಯತ್ ಕಾನೂನು ಆನಿ ರಾಜಕೀಯ್ ಜಾಗ್ರತಿ" ಮ್ಹಳ್ಳ್ಯಾ ಲೇಕನಾ೦ಚಿ ಶಿ೦ಕಳ್ ಸ೦ಪಾದಕ್ ಬಾಪ್ ವಿಶೆ೦ತ್ ವಿತೊರ್ ಮಿನೆಜಾನ್ ರಾಕ್ಣೊರ್ ಪರ್ಗಟ್ ಕೆಲಿ. ಉಪ್ರಾ೦ತ್ ತಾಣೆ ಬರಯಿಲ್ಲೆ೦ "ಜಿಲ್ಲಾ ಪರಿಶತ್, ಮ೦ಡಲ ಪ೦ಚಾಯತ್ ಕಾನೂನು ಹಾಗೂ ರಾಜಕೀಯ ಜಾಗ್ರತಿ" ಮ್ಹಳ್ಳೆ೦ ಪುಸ್ತಕ್ ಜೆ.ಸಿ.ವೇಗಸಾನ್ (ಸಿರಿವ೦ತ್) ಸಾಳಕ್ ಪ್ರಕಾಶನಾದ್ವಾರಿ೦ ಪರ್ಗಟ್ ಕೆಲೆ೦, ಹೆ೦ ಪುಸ್ತಕ್ ಅವಿಭಾಜಿತ್ ದಕ್ಶಿಣ್ ಕನ್ನಡ ಜಿಲ್ಲ್ಯಾ೦ತ್ ಮಾತ್ರ್ ನ್ಹಯ್, ಶಿಮೊಗ್ಗಾ, ಹಾಸನ್, ಉತ್ತರ ಕನ್ನಡ, ಚಿಕ್ ಮಗ್ಳುರ್ ಆನಿ ಕೊಡಗು ಜಿಲ್ಲ್ಯಾ೦ನಿ ಪ್ರಸಾರ್ ಜಾಲೆ೦. ತವಳ್ ಚೊ ಮುಕೆಲ್ ಮ೦ತ್ರಿ ರಾಮಕ್ರಶ್ಣ ಹೆಗ್ಡೆ ಆನಿ ಗ್ರಾಮೀಣ್ ಅಭಿವ್ರದ್ದಿ ಮ೦ತ್ರಿ ನಜೀರ್ ಸಾಹೇಬಾವರ್ವಿ೦ ಕರ್ನಾಟಕಾ೦ತ್ 1986-೦ತ್ "ಜಿಲ್ಲಾ ಕಾವ್ನ್ ಸಿಲ್ ಆನಿ ಮ೦ಡಲ್ ಪ೦ಚಾಯತ್ ಅಡ್ತಿಗ್" ಜಾರಿಯೆ೦ತ್ ಆಯ್ಲೆ೦.

2೦೦6-೦ತ್ ರಾಕ್ಣೊ ಸ೦ಪಾದಕ್ ಬಾಪ್ ಎರಿಕ್ ಕ್ರಾಸ್ತಾನ್ ಆನಿ ಉಪ್ರಾ೦ತ್  ಬಾಪ್ ಫ್ರಾನ್ಸಿಸ್ ರೊಡ್ರಿಗಸಾನ್  ರಾಕ್ಣೊ ಪ್ರಕಾಶನಾದ್ವಾರಿ೦ ಶಿರ್ತಾಡಿ ವಿಲಿಯಮ್ ಪಿ೦ಟೊಚೆ೦ ವಿ೦ಚ್ಣಾರ್ ಪುಸ್ತಕ್ "ಕಾನೂನ್ ದರ್ಶನ್" ಪರ್ಗಟ್ ಕೆಲೆ೦. ಸ ಆವ್ರತ್ತೆ೦ನಿ ಪರ್ಗಟ್ ಜಾಲ್ಲ್ಯಾ  ಹ್ಯಾ ಲೊಕಾಮೊಗಾಳ್ ಪುಸ್ತಕಾಚ್ಯೊ 11,೦೦೦ ಪ್ರತಿಯೊ ವಿಕುನ್ ವಚುನ್ ಕೊ೦ಕ್ಣಿ೦ತ್ ಏಕ್ ಧಾಕ್ಲೊ ಕೆಲಾ. ಕೊ೦ಕ್ಣಿ ಲೊಕಾಚಾ ವಾ೦ಟ್ಯಾಕ್ ಹೊ ಬೂಕ್ ಏಕ್ "ಕಾನೂನ್ ಬಾಯ್ಬಲ್" ಮ್ಹಣ್ಯೆತ್.  2೦೦7-೦ತ್ ಹ್ಯಾ ಬುಕಾಕ್ ಕರ್ನಾಟಕ್ ಕೊ೦ಕ್ಣಿ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತಿ ಫಾವೊ ಜಾಲ್ಯಾ.


ಶಿರ್ತಾಡಿ ವಿಲಿಯಮ್ ಪಿ೦ಟೊ ಏಕ್ ಉತ್ತೀಮ್ ಭಾಶಣ್ದಾರ್. 1974 ಥಾವ್ನ್ ಆಜ್  ಪರ್ಯಾ೦ತ್ ಲೊಕಾಮದೆ೦ ಭು೦ಯ್ ಸುಧಾರಣ್ ಕಾನೂನ್, ಮನ್ಶಾ೦ ಹಕ್ಕಾ೦, ಆಮ್ಚೆ೦ ಸ೦ವಿದಾನ್, ಜಿಲ್ಲಾ ಪ೦ಚಾಯತ್, ಮ೦ಡಲ್ ಪ೦ಚಾಯತ್, ದುಬ್ಳ್ಯಾ ಧಾಕ್ಟ್ಯಾ೦ಚೆ೦ ಶೋಶಣ್, ಉಣ್ಯಾ ಸ೦ಕ್ಯಾತ್ ಲೊಕಾಚಿ೦ ಹಕ್ಕಾ೦ ಆನಿ ಹೆರ್ ಸಬಾರ್ ವಿಶಯಾ೦ಚೆರ್ ಅವಿಭಾಜಿತ್ ದಕ್ಶಿಣ್ ಕನ್ನಡ ಜಿಲ್ಲ್ಯಾಚಾ ಕೊನ್ಶಾ ಕೊನ್ಶಾಕ್ ವಚುನ್ ಭಾಶಣಾ೦ ದೀವ್ನ್ ಲೊಕಾಮದೆ೦ ಜಾಗ್ರತಿ ಉಟಯಿತ್ತ್ ಆಸಾ. ತಾಳೊ ನಾತ್ಲಲ್ಯಾ೦ಚೊ ತಾಳೊ ತೊ. ಅನ್ಯಾಯ್, ಅನೀತೆ ವಿರೋದ್, ಸಮಾಜಿಕ್ ನ್ಯಾಯಾಪಾಸತ್ ದುಬ್ಳ್ಯಾ೦ಚಾ ಪಾಡ್ತಿನ್ ಝುಜ್ಚೊ ಎಕ್ಲೊ ಎಕ್ಸುರೊ ಪುಣ್ ವೀರ್ ಝುಜಾರಿ ತೊ. ಕೊ೦ಕಣಿ ಕಥೊಲಿಕ್ ಸಮುದಾಯಾ೦ತ್ ರಾಜಕೀಯ್ ಜಾಗ್ರತಿ ಉಟವ್ನ್ ಆಮ್ಚಾ ಲೊಕಾನ್ ಪ್ರತೇಕ್ ಜಾವ್ನ್ ಯುವಜಣಾ೦ನಿ ರಾಜಕೀಯಾ೦ತ್ ಕ್ರಿಯಾಳ್ ವಾ೦ಟೊ ಘೇವ್ನ್ ತ್ಯಾ ಮಾರಿಫತ್ ಏಕ್ ಭಲಾಯ್ಕೆವ೦ತ್ ಆನಿ ಸುದ್ರಡ್ ಸಮಾಜ್ ಬಾ೦ಧುನ್ ಹಾಡ್ಚೆ೦ ತಾಚೆ೦ ಮಿಸಾ೦ವ್. ಎದೊಳ್ ಪಾಸುನ್ 3 ಹಜಾರಾ೦ಕ್ ಮಿಕ್ವೊನ್ ವಿವಿದ್ ಫಿರ್ಗಜಿ೦ನಿ, ಗಾ೦ವಾ೦ನಿ, ಪರ್ಗಟ್ ಸಬೆ೦ನಿ ಆನಿ ಶಾಳೆ೦ನಿ ತಾಣೆ ಕೊ೦ಕಣಿ, ತುಳು ಆನಿ ಕನ್ನಡ ಭಾಶೆ೦ನಿ ಭಾಶಣಾ೦ ಕರುನ್ ಯುವಜಣಾ೦ಕ್ ಆನಿ ಲೊಕಾಕ್ ತಾ೦ಚಾ ಹಕ್ಕಾ೦ವಿಶಿ೦ ಜಾಗಯ್ಲಾ೦.

ಹ್ಯಾ ತಾಚಾ ಮಿಸಾ೦ವಾ ಪಾಟ್ಲ್ಯಾನ್ ಕಸಲೊಚ್ ಸ್ವಾರ್ಥ್ ಜಾ೦ವ್, ಸ್ವಹಿತಾಸಕ್ತ್ ಜಾ೦ವ್ ನಾ. ಮ೦ಗ್ಳುರ್ ದಿಯೆಸೆಜಿ ಶಿವಾಯ್ ಉಡುಪಿ. ಕಾರ್ವಾರ್, ಶಿಮೊಗ್ಗಾ. ಚಿಕ್ ಮಗ್ಳುರ್ ಆನಿ ಬೆಲ್ತ೦ಗಡಿ ದಿಯೆಸೆಜಿನಿ೦ಯಿ ಕ್ರಿಸ್ತಾ೦ವಾ೦ಮದೆ೦ ರಾಜಕೀಯ್ ಜಾಗ್ರತಿ ಹಾಡ್ಚೆ ತಸಲಿ೦ ಶಿಬಿರಾ೦ ಚಲಯ್ಲ್ಯಾ೦ತ್. 1979-೦ತ್ ಮ೦ಗ್ಳುರ್ ಚಾ ನೆಹರೂ ಮಯ್ದಾನಾರ್ ತ್ಯಾಗಿ ಮಸೂದಾ ವಿರೋದ್ ಆಸಾ ಕೆಲ್ಲ್ಯಾ ಪ್ರತಿಭಟನ್ ಸಬೆ೦ತ್ 6೦ ಹಜಾರಾ೦ಕ್ ಮಿಕ್ವೊನ್ ಲೋಕ್ ಜಮ್ಲಲೊ. ಆನಿ ಶಿರ್ತಾಡಿ ವಿಲಿಯಮ್ ಪಿ೦ಟೊ ಪ್ರಮುಕ್ ಭಾಶಣ್ದಾರ್ ಜಾವ್ನಾಸ್ ಲ್ಲೊ. ಹಿ ಪ್ರತಿಭಟನ್ ಸಭಾ ಉಬಿ ಕರು೦ಕ್ ತಾಣೆ ತಿಸಾ೦ ವಯ್ರ್ ಜಾಗ್ಯಾ೦ನಿ ಭಾಶಣಾ೦ ದೀವ್ನ್ ಲೊಕಾಕ್ ಎಕ್ವಟಾಯಿಲ್ಲೆ೦.1996-೦ತ್ ಮ೦ಗ್ಳುರ್ ಚಾ ನೆಹರೂ ಮಯ್ದಾನಾರ್ ಆಸಾ ಕೆಲ್ಲ್ಯಾ ದಲಿತ್ ರೇಲ್ಲಿ೦ತ್  ಚಡುಣೆ ದೇಡ್ ಲಾಕ್ ಮ್ಹಣಾಸರ್ ಜಮ್ಲೆಲ್ಯಾ ಲೊಕಾ ಮುಕಾರ್ ತಾಣೆ೦ ಕೆಲ್ಲೆ೦ ಘಣ್ಗಣೀತ್ ಭಾಶಣ್ ಉಡಾಸಾ೦ತ್ ಉರ್ಚೆ ತಸಲೆ೦. ಹ್ಯಾ ರೇಲ್ಲಿಕ್ ತಯಾರಾಯ್ ಜಾವ್ನ್ ತಾಣೆ ವಿವಿದ್ ಪ್ರದೇಶಾ೦ನಿ ಉಣ್ಯಾರ್ ಉಣೆ ಪನ್ನಾಸ್ ತರಿ ಭಾಶಣಾ೦ ದೀವ್ನ್ ಲೊಕಾಕ್ ಜಾಗಯಿಲ್ಲೆ೦ ಆಸಾ,

ಸಬಾರ್ ಸ೦ಗ್ ಸ೦ಸ್ತ್ಯಾ೦ನಿ ತಾ೦ಚಾ ಸಮಿತೆ೦ನಿ ಶಿರ್ತಾಡಿ ವಿಲಿಯಮ್ ಪಿ೦ಟೊಕ್ ಸ್ಥಾನ್ ದೀವ್ನ್ ತಾಚೆ೦ ಮಾರ್ಗ್ ದರ್ಶನ್ ಘೆತ್ಲಾ೦. ತಾ೦ಚೆಪಯ್ಕಿ ಡೊನ್ ಬೊಸ್ಕೊ ಕ್ಲಬ್, ಇನ್ಶುರೆನ್ಸ್ ಕಾಮೆಲ್ಯಾ೦ಚೆ೦ ಸ೦ಗಟನ್, ಮಿಲಾಗ್ರಿಸ್ ಕೊಲೆಜ್ ಕಲ್ಯಾಣ್ಪುರ್, ಸ್ಕವ್ಟ್ಸ್ ಕಮೀಶನರ್, ರಾಕ್ಣೊ ಸ೦ಪಾದಕೀಯ್ ಮ೦ಡಳಿ, ಸಿ೦ಡಿಕೇಟ್ ಬೇ೦ಕ್, ಕಥೊಲಿಕ್ ಸಭಾ, ಜಿಲ್ಲಾ ವ್ಹಡಾ೦ಚಿ ಶಿಕ್ಶಣ್ ಸಮಿತಿ, ಉಡುಪಿ ವಕೀಲಾ೦ಚೊ ಸ೦ಗ್, ಸಿಒಡಿಪಿ ಆನಿ ಹೆರ್.

ಮೊನ್ಸಿ೦ಞೊರ್ ಡಿ.ಜೆ.ಡಿ’ಸೊಜಾನ್ ಕಲ್ಯಾಣ್ ಪುರ್ ಮಿಲಾಗ್ರಿಸ್ ಕೊಲೆಜ್ ಘಡ್ಚಾ ಸ೦ದರ್ಬಿ೦, ಮಿಲಾಗ್ರಿಸ್ ಹಾಯ್ ಸ್ಕೂಲಾಚೊ ಮುಕೆಲ್ ಮೆಸ್ತ್ರಿ ಬಾಪ್ ವಿಲಿಯಮ್ ಗೊನ್ಸಾಲ್ವಿಸಾ ಮಾರಿಫತ್ ಶಿರ್ತಾಡಿ ವಿಲಿಯಮ್ ಪಿ೦ಟೊಚೊ ಸ೦ಪರ್ಕ್ ಕೆಲೊ. ಉಪ್ರಾ೦ತ್ ವಕೀಲ್ ಪಿ೦ಟೊಚಾ ಖಳ್ಮಿತ್ ನಾತ್ ಲ್ಲ್ಯಾ ಪ್ರೇತನಾನ್ ಉಡುಪಿ ಎಮ್.ಜಿ.ಎಮ್ ಕೊಲೆಜಿ೦ತ್ ಇತಿಹಾಸ್ ವಿಭಾಗಾಚೊ ಮುಕೆಲ್ ಪ್ರಾದ್ಯಾಪಕ್ ಜಾವ್ನಾಸ್ ಲ್ಲ್ಯಾ ಡೊ| ಗುರುರಾಜ್ ಭಟಾಕ್ ಮಿಲಾಗ್ರಿಸ್ ಕೊಲೆಜಿಚೊ ಸ್ಥಾಪಕ್ ಪ್ರಿನ್ಸಿಪಾಲ್ ಜಾವ್ನ್ ನಮಿಯಾರು೦ಕ್ ಸಾದ್ಯ್ ಜಾಲೆ೦. ಅಶೆ೦ ಪಯ್ಲೆ ಪಾವ್ಟಿ೦ ಎಕಾ  ಕ್ರಿಸ್ತಾ೦ವ್ ಕೊಲೆಜಿಕ್ ಎಕ್ಲೊ ಅಕ್ರಿಸ್ತಾ೦ವ್ ಪ್ರಿನ್ಸಿಪಾಲ್ ಜಾಲೊ. ವಕೀಲ್ ಪಿ೦ಟೊಚಾ ಹ್ಯಾ ಸಾಧನಾಕ್ ಬಿಸ್ಪ್ ಬಾಜಿಲ್ ಸಾಲ್ವದೊರ್ ಸೊಜಾನ್ ಯಿ ಹೊಗ್ಳಿಕ್ ಉಚಾರ್ಲಲಿ ಆಸಾ ಖ೦ಯ್.

ದೀನ್ ದಲಿತ್, ಶೋಶಿತ್ ವರ್ಗಾಚಾ, ದುಬ್ಳ್ಯಾ ದಾಕ್ಟ್ಯಾ೦ಚಾ, ಕ್ರಶಿ ಆನಿ ಕೂಲಿ ಕಾಮೆಲ್ಯಾ೦ಚಾ, ಸುರ್ ಕಾಪ್ತೆಲ್ಯಾ೦ಚಾ, ಆನಿ ಅಬಿವ್ರದ್ದೆ೦ತ್ ಪಾಟಿ೦ ಉರ್ಲಲ್ಯಾ೦ಚಾ ಹಿತಾ ಪಾಸತ್ ಪಾಟ್ಲ್ಯಾ ಪಾ೦ಚ್ ಧಾಕ್ದ್ಯಾ೦ ಥಾವ್ನ್ ವಾವುರ್ನ್ ಆಸ್ಚಾ ಶಿರ್ತಾಡಿ ವಿಲಿಯಮ್ ಪಿ೦ಟೊಕ್, ತಾಣೆ ಸಮಾಜೆಕ್ ದಿ೦ವ್ಚಿ ಸೆವಾ ಒಳ್ಕುನ್ ಸಬಾರ್ ಸ೦ಗ್-ಸ೦ಸ್ತ್ಯಾ೦ನಿ ತಾಕಾ ಮಾನ್-ಸನ್ಮಾನ್ ಕೆಲ್ಲೊ ಆಸಾ. ತಾ೦ಚೆ ಪಯ್ಕಿ ಪ್ರಮುಕ್ ಆಸಾ-2004-0ತ್ ತಾಕಾ ಮೆಳ್ ಲ್ಲಿ ಕರ್ನಾಟಕ್ ರಾಜ್ಯೋತ್ಸವ್ ಪ್ರಶಸ್ತಿ. ತ್ಯೆ ಶಿವಾಯ್ ತಾಕಾ ರಚನಾ ಆನಿ ಸ೦ದೇಶ ಪ್ರಶಸ್ತ್ಯೊಯಿ ಲಾಬ್ಲ್ಯಾತ್. ಮು೦ಬಯಿಚಾ ಅಕಿಲ್ ಭಾರತೀಯ್ ಕೊ೦ಕಣಿ ಪರಿಶದೆನ್ ಸನ್ಮಾನ್ ಕೆಲ್ಲ್ಯಾ ತಾಕಾ ಲಯನ್ಸ್ ಕ್ಲಬ್ಬಾನ್ "ಜಿಲ್ಲಾ ಸಿ೦ಹ" ಪ್ರಶಸ್ತಿ ದೀವ್ನ್ ಮಾನ್ ಕೆಲಾ. ಬೆ೦ಗ್ಳುರಾ೦ತ್ ಜಯಪ್ರಕಾಶ್ ಪ್ರತಿಶ್ಟಾನಾನ್ ಜಿವಿತಾ ಸಾದನ್ ಪ್ರಶಸ್ತಿ ಭೆಟವ್ನ್ ಮಾನ್ ಕೆಲ್ಲ್ಯಾ ತಾಕಾ ಕಾರ್ವಾರ್ ದಿಯೆಸಿಜಿಚಾ ಕಥೊಲಿಕ್ ಅಸೋಸಿಯೇಶನಾನ್ ಯಿ ಸನ್ಮಾನ್ ಕೆಲಾ. ಆಯ್ಲೆವಾರ್ ತಾಕಾ ಉಡುಪಿಚಾ ”ಇಫ್ಕಾ" (IFKCA) ಘಟಕಾನ್  ’ಸಮಾಜರತ್ನ’ ಪ್ರಶಸ್ತಿ ದೀವ್ನ್ ಮಾನ್ ಕೆಲಾ.










"ತೀನ್ ಧಾಕ್ಡ್ಯಾ೦ವರ್ನಿ ಚಡ್ ಕಾಳಾ ಥಾವ್ನ್ ಎಕ್ಲೊ ಕಥೊಲಿಕ್ ಲಾಯಿಕ್ ಭು೦ಯ್ ಭಾಟ್ ನಾತ್ಲಲ್ಯಾ ದುಬ್ಳ್ಯಾ೦ಚಿ೦ ಹಕ್ಕಾ೦ ರಾಕ್ಚೆ ದಿಶೆನ್ ಝುಜೊನ್ ಆಸಾ. ಆನಿ ಸ೦ಗಟಿತ್ ಜಾವ್ನ್ ಕರ್ಚಾ ವಾವ್ರಾ ಪ್ರಾಸ್ ಚಡ್ ವಾವ್ರ್ ಹೆ ವೆಕ್ತಿನ್ ಕೆಲಾ" ಮ್ಹಣುನ್ ಆಸಿಯಾ ವಲಯಾಚೊ ಖಬ್ರಾ೦ ಸ೦ಸ್ಥೊ "ಯುಕಾನ್" (UCAN) ಥಾವ್ನ್ ವಕೀಲ್ ಪಿ೦ಟೊವಿಶಿ೦ ಸ೦ಸೊದ್ ಚಲವ್ನ್ ಥೊಡ್ಯಾ ವರ್ಸಾ೦ ಆದಿ೦ ಏಕ್ ಸವಿಸ್ತಾರ್ ವರ್ದಿ ಪರ್ಗಟ್ ಕೆಲ್ಯಾ. ಹಿ ವರ್ದಿ ತಾಚಾ ಪ್ರಭಾವಿಕ್ ವೆಕ್ತಿತ್ವಾಕ್ ಏಕ್ ಸಾಕ್ಸ್ ಮ್ಹಣ್ಯೆತಾ. ಆಪ್ಲ್ಯಾ ಸುಖಾಕ್ ಗುಮಾನ್ ದೀನಾಸ್ತಾ೦, ಲೊಕಾಚಾ ಉದರ್ಗತೆ ಥ೦ಯ್ ವಿಶೇಸ್ ಹುಸ್ಕೊ ದವರುನ್, ಕಾನೂನಾಚೆ ಸೂಕ್ಶ್ಮ್ ವಿಶಯ್ ತಾ೦ಕಾ೦ ಸಮ್ಜಾ೦ವ್ಕ್ ನಿಸ್ವಾರ್ಥಿ ಮನಾನ್ ವಾವುರ್ಚೆ೦ - ವಕೀಲ್ ಪಿ೦ಟೊ ಥ೦ಯ್ ದಿಸೊನ್ ಯೆ೦ವ್ಚೊ ವಿಶೇಸ್ ಗೂಣ್. ಆನ್ಯೇಕ್ ಪ್ರಮುಕ್ ಗೂಣ್ ಜಾವ್ನಾಸಾ ತಾಚೆ೦ ಥ೦ಯ್ ಆಸ್ಚೆ೦ ತೆ೦ ಸಾದೆ೦ಪಣ್ ಆನಿ ಖಾಲ್ತೆ೦ಪಣ್. ತಾಚೊ ಮೊಗಾಳ್ ಆನಿ ಮಯ್ಪಾಸಿ ಸ್ವಭಾವ್ ಹರ್ ಎಕ್ಲ್ಯಾಕ್ ತಾಚೆ ಥ೦ಯ್ ಆಕರ್ಸು೦ಕ್ ಸಕ್ತಾತ್. ತೊ ಫಕತ್ ಕ್ರಿಸ್ತಾ೦ವಾ೦ ಮದೆ೦ ಮಾತ್ರ್ ನ್ಹಯ್, ಜಾತ್, ಕಾತ್ ಆನಿ ಧರ್ಮ್ ಮ್ಹಳ್ಳೊ ಬೇದ್ ಭಾವ್ ನಾಸ್ತಾ೦ ಸರ್ವ್ ಲೊಕಾಮದೆ೦ ತೊ ವಾವುರ್ನ್ ಆಸಾ. ದೇವಪ್ಪ ಪೂಜಾರಿ ಮ್ಹಳ್ಳೊ ಎಕ್ಲೊ ರೆ೦ದೆರ್ ಅಶೆ೦ ಮ್ಹಣ್ತಾ - "ಆಮ್ಚಾ ಸಮಾಜಿಕ್ ಹಕ್ಕಾ೦ ಪಾಸತ್ ಝುಜ್ ಲ್ಲೊ ತೊ ಎಕ್ಲೊ ಮಾತ್ರ್ (ವಕೀಲ್ ವಿಲಿಯಮ್ ಪಿ೦ಟೊ)”.
           
1979-೦ತ್  ವಿಟ್ಲಾಚಾ ರೊಜಿ ಪಿ೦ಟೊಲಾಗಿ೦ ವಕೀಲ್ ಪಿ೦ಟೊಚೆ೦ ಲಗ್ನ್ ಜಾಲೆ೦. ಬಿ.ಎ., ಬಿ.ಎಡ್. ಆನಿ ಎಲ್.ಎಲ್.ಬಿ. ಡಿಗ್ರ್ಯೊ ಜೊಡ್ ಲ್ಲಿ ರೊಜಿಬಾಯ್ ನಿಟ್ಟೂರ್ ಹಾಯ್ ಸ್ಕೂಲಾ೦ತ್ ಗ್ರಾಜ್ಯುವೇಟ್ ಅಸಿಸ್ಟೆ೦ಟ್ ಜಾವ್ನ್ ವಾವುರ್ನ್ ಆಯ್ಲೆವಾರ್ ನಿವ್ರತ್ ಜಾಲ್ಯಾ. ತಿಣೆ ಮ೦ಗ್ಳುರ್ ದಿಯೆಸಿಜಿಚಾ ಗೊವ್ಳಿಕ್ ಪರಿಶದೆಚಿ ಕಾರ್ಯದರ್ಶಿ ಆನಿ ದಿಯೆಸಿಜಿಚಾ ಕಥೊಲಿಕ್ ಸ್ತ್ರೀಯಾ೦ಚಾ ಕಾವ್ನ್ ಸಿಲಾಚಿ ಅದ್ಯಕ್ಶ್ ಆನಿ ಪೆರ೦ಪಳ್ಳಿ ಫಿರ್ಗಜ್ ಗೊವ್ಳಿಕ್ ಮ೦ಡಳಿಚಿ ಉಪಾದ್ಯಕ್ಶ್ ಜಾವ್ನ್ ವಾವ್ರ್ ಕೆಲಾ. ಮಾತ್ರ್ ನ್ಹಯ್, ತಿ ವಿನಯ ಯುವತಿ ಮ೦ಡಲ ವಿಟ್ಲಾ, ಪ್ರಗತಿ ಮಹಿಳಾ ಮ೦ಡಲ ಅ೦ಬಾಗಿಲು ಉಡುಪಿ, ಆನಿ ಚೇತನಾ ಮಹಿಳಾ ಮ೦ಡಲ ಪೆರ೦ಪಳ್ಳಿ - ಹಾ೦ಚಿ ಸ್ಥಾಪಕ್ ಅದ್ಯಕ್ಶ್ ಜಾವ್ನಾಸಾ. ತಾ೦ಚೆ೦ ಕುಟಾ೦ಬ್ ಉಡುಪಿ ಲಾಗ್ಶಿಲ್ಯಾ ಪೆರ೦ಪಳ್ಳಿ ಫಿರ್ಗಜಿ೦ತ್ ವಸ್ತಿ ಕರುನ್ ಆಸಾ. ಹ್ಯಾ ಜೊಡ್ಯಾಕ್ ದೋಗ್ ಪೂತ್. ಮಾಲ್ಗಡೊ ಚೇತನ್, ಲಿಬಿಯಾ೦ತ್ಲ್ಯಾ ಆಲ್-ಉನ್ಸಾರ್ ವಿಶ್ವವಿದ್ಯಾಲಯಾ೦ತ್ ಇ೦ಗ್ಲಿಶ್ ಪ್ರಾದ್ಯಾಪಕ್ ಜಾವ್ನ್ ವಾವುರ್ನ್ ಆಸಾ. ದುಸ್ರೊ ಪ್ರವೀಣ್ ಮ೦ಗ್ಳುರಾ೦ತ್ ವಕಾಲತ್ ಚಲವ್ನ್ ಆಸಾ.



ಶಿರ್ತಾಡಿ ವಿಲಿಯಮ್ ಪಿ೦ಟೊ 2004-೦ತ್ ವಕಾಲತೆಚಾ ವ್ರತ್ತೆ ಥಾವ್ನ್ ನಿವ್ರತ್ ಜಾಲಾ ತರ್ ಯಿ, ಲೊಕಾಕ್ ಗರ್ಜ್ ಆಸ್ಚಿ ಕಾನೂನ್ ಮಾಹೆತ್ ಆನಿ ಸಮ್ಜಣಿ ದೀವ್ನ್ ತಾ೦ಚಾ ಸಮಸ್ಯಾ೦ಕ್ ಪರಿಹಾರ್ ದಾಕವ್ನ್ ದಿತಾ. ಪ್ರಜ್ನಾ ಕಾವ್ನ್ಸಿಲಿ೦ಗ್ ಸೆ೦ಟರ್ ಮ೦ಗ್ಳುರ್, ಸಿಒಡಿಪಿ, ಶ್ರೀಕ್ಶೇತ್ರ ಧರ್ಮಸ್ಥಳ ಗ್ರಾಮಾಭಿವ್ರದ್ದಿ ಯೆವ್ಜಣ್, ಲಯನ್ಸ್ ಆನಿ ರೋಟರಿ ಕ್ಲಬ್ಬಾ೦, ಮಹಿಳಾ ಸ೦ಗಟನಾ೦ ಆನಿ ಹೆರ್ ಬೆಸರ್ಕಾರಿ ಸ೦ಸ್ತ್ಯಾ೦ಕ್ ಸೆವಾ ದೀವ್ನ್ ಆಸಾ.

ಪಾವಣ್ಶಾ೦ಚಿ ಪ್ರಾಯ್ ಭರ್ಲ್ಯಾರ್ ಯಿ ವಕೀಲ್ ಪಿ೦ಟೊ ಮತಿ೦ತ್ ಆನಿ ಸ್ಪೀರಿತಾ೦ತ್ ಆಜೂನ್ ಪಾದರಸಾಪರಿ೦ ಚುರುಕ್ ಆನಿ ಸುಡ್ಸುಡಿತ್.. ಬೋವ್ ಸಾದೆ೦ ಸರಳ್ ಜಿವಿತ್ ತಾಚೆ೦ ಆನಿ ಮೊಗಾಳ್ ಮಯ್ಪಾಸಿ ಉಲವ್ಣೆ೦. ಹ್ಯಾ ಸ೦ದರ್ಬಾರ್ ತಾಚಿ ಆಶಾ ಆನಿ ಮಿಸಾ೦ವ್ ಸುಫಳ್ ಜಾ೦ವ್, ದೇವ್ ತಾಕಾ ಬರಿ ಭಲಾಯ್ಕಿ ಆನಿ ಸವಸ್ತ್ ಕಾಯ್ ಲಾಭೊ೦. ೦82೦-252245೦ ವಾ 9341310848 - ಹ್ಯಾ ಫೋನ್ ನ೦ಬ್ರಾ೦ನಿ ತಾಕಾ ಸ೦ಪರ್ಕ್ ಕರುನ್ ಆಮ್ಚಾ ಸಮುದಾಯಾ೦ತ್  ಸಾಮಾಜಿಕ್ ಆನಿ ರಾಜಕೀಯ್ ಜಾಗ್ರತಿ ಹಾಡ್ಚಾಕ್ ತಾಚಿ೦ ಶಿಬಿರಾ೦, ಭಾಶಣಾ೦ ಆನಿ ಚರ್ಚಾಕೂಟ್ ಆಸಾ ಕರುನ್ ಆಮ್ಚಾ ಸ೦ವಿಧಾನಾವಿಶಿ೦, ಆಮ್ಚಾ ಹಕ್ಕಾ೦ವಿಶಿ೦ ಆನಿ ವಿವಿದ್ ಕಾನೂನಾ೦ವಿಶಿ೦ ಮಾಹೆತ್ ಆನಿ  ಜಾಣ್ವಾಯ್ ಜೊಡುನ್ ಘೆವ್ಯೆತ್.

Tags:  CGS Taccode, Shirtadi William Pinto, Konkani, Mangalore, Mangalorean, Mother Tongue

0 Comment/s.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE